Helsing på kvinnedagen

mar. 8, 2026

Det internasjonale esperantoforbundet, UEA, har sendt ut ei helsing i høve kvinnedagen 2026, med den hovudbodskapen at UEA framleis er oppteken av likestilling.

I ei pressemelding viser UEA til at FN sitt tema for kvinnedagen i år er «Rettar, rettferd og handling for alle kvinner og jenter». UEA trekkjer fram at ein må fjerne diskriminerande lover, juridiske problem og skadeleg praksis som går ut over tryggleiken til kvinner og jenter. Ein må ha likestilling mellom kjønna, med tilgang til juridisk støtte, utdanning, informasjon og beslutningsprosessar.

Som språkorganisasjon legg UEA særleg vekt på språklege rettar. For å kunne vere med i samfunnslivet fullt ut må ein også ha tilgang til både morsmålet og til fleire språk til internasjonal bruk. Språkdiskriminering gjer andre former for diskriminering sterkare, skriv UEA. Organisasjonen legg til at esperanto og det tilhøyrande nettverket av esperantotalande bidreg til ein meir inkluderande internasjonal dialog, med ei sterkare stemme for sivilsamfunnet, medrekna kvinner og jenter. UEA avsluttar med at kvinner og jenter må kunne nyte fulle rettar, likestilt vern og reelt høve til å utvikle evnene sine.